Hezkuntza ona izatearen arrazoiak

Ezer baino lehen, hain hezkuntza sistema aurreratu eta onaren arrazoiak azaldu nahiko nituzke, hauek gabe oso zaila baita ulertzea.

"Citizenship Education" izeneko ikasgai batetik OAJ edo "Trade Union of Education in Finland"-era joan ginen. Hemen, "irakasleen batasun" moduko bati buruz hitz egin ziguten, (eta ez da partidu politiko bat, jeje) baizik eta irakasleen eskubideak defendatzeaz arduratzen den erakunde bat. Irakasle eta gobernuaren arteko bitartekaritzan aritzen da eta beraz, erregulazioaz arduratzen da. Ez gobernuak eta ez irakasleek ezin dute erabakirik hartu OAJ-ekin adostu gabe. Bestalde aipatu behar da erakunde hau partidu politikoetatik at dagoela.

Finlandiako irakasle guztien %95edo kidetza omen daukate, hortik datorkio bere indarra. Zenbat eta jende gehiago, orduan eta indar handiago. Talde nagusi honen barruan azpi taldeak daude era berean: haur-hezkuntzako irakasleen taldea, eskolaurreko irakasleak, unibertsitatekoak... eta talde hauek zenbat eta handiago orduan eta ahots indartsuagoa izango dute.

Bileran zehar emakume batek azaldu zigunez, 3 arrazoi nagusi daude hezkuntza finlandiarra hain ona izateko:

1. Irakasle onak: heziketa oso ona jaso dute eta beraien lanaren garrantziaz kontziente dira.
2. Hezkuntza publikoa: pribaturik ez dago, eta beraz, denek aukera berdinak dauzkate.
3. Egoera politiko egokia: ados ez egon arren, beste taldeekin mahai batean jarri eta eztabaidatzeko gai dira adostasun batera heldu arte.

Kontraesana dirudien arren, ez da hainbeste diru bideratzen hezkuntzara, BPGren %6a bakarrik, beste herrialdeen batezbestekoa baino gutxiago alegia.

Soldatei dagokienez, 2.000 euro inguru kobratzen dute baina gutxi gora-beherakoa da (hemengo prezioak ikusita, ez da hainbeste). Lehen aipa bezala, taldearen indarraren arabera eskubide gehiago lortuko dituzte. Baina irakasleen esanetan gehiago kobratu beharko lukete, sekula ez daudela konforme (inor ba al dago konforme?)

Bukatzeko, historikoki Finlandian hezkuntzari eman zaion garrantzia azpimarratu nahiko nuke. Izan ere, mendeetan zehar, irakurten ez zekienak ezin zuen ezkondu. Hezkuntzen balioa ukaezina da beraz kultura honetan.

Jo dezagun orain Espainia edo Frantziara (E.H-k ez baitauka bere hezkuntza sistema propiorik). Nola hobetu gure egoera? Horrelako erakunde batek ezertan lagunduko al luke? Diru gehiago inbertitzeak lagunduko al luke planifikazio egokirik gabe? (Finlandiako kasuan dirua ez dela garrantzitsuena argi geratzen da).

Hausnartu nahi duenarentzat galderak hor gelditzen dira.